肥仔K小腿肌肉撕裂，不能走動，一班中學好友聞訊，買埋Pizza上去佢屋企探病，一路食Pizza，一路睇立法會補選新聞。呢幾位同學都係專業人士，乜師物師嗰類，人人考晒牌，人工唔錯，只係煩氣冇錢供首期，冇法子買到樓，所以個個鬧梁振英辣招害人，話陳茂波如果想民望上升，就係放寬供樓按揭成數咁話。既然對特區政府之樓價政策不滿，對選舉有乜睇法呀？有一位乜乜師話：「我地大老闆出咗電郵，建議我地投票畀呢四位，就係陳家珮、鄭泳舜、鄧家彪與及謝偉銓，視乎地區及是否功能組別選民而定。」
肥仔K問：「你地點回應？」乜乜師大笑：「幾乎所有80後同事都答noted with thanks！點樣投票我駛乜話畀老闆聽呀，如果佢真係問到，我咪答投咗畀鄧家彪囉！」眾人大笑。
呢類80後專業人士，加入不同功能組別為選民人數愈來愈多，形成一股「年齡組別」力量，足以令建制派不安，譬如司馬文在行內不算有名，身為建築測量界人士，竟有僭建新聞，實在不利，但在建築、測量都市規劃及園境界，仍然得到2345票，得票率44.5%，只係輸畀謝偉銓584票，將謝偉銓嚇咗一跳，可見得有不少年青選民係鍾意投票畀反建制人士，理得佢係有僭建嘅洋人。時間總是在年青人一邊，90後專業人士即將湧現，與80後連成一氣，下一屆選舉（2020年）嘅功能組別，除咗公司代表投票嘅商會之外，其他組別有大可能由非建制派上位，形成歷史諷刺。點解呢？泛民一向反對功能組別，主張立法會全部直選，點知道因為人口結構轉變，年老保守派選民數字多於年青人，於是直選時，所謂黃金投票比率（即泛民佔六成，建制派佔四成），逐漸打破，泛民為之危危乎。但在個人投票之功能組別，因老派專業人士陸續退休，80後、90後專業人士會員逐漸佔多數，益咗非建制派候選人㖭，此是在政制設計時，冇人諗得到嘅！左丁山問過一位80後工程師：「點解你會投泛民？」佢答得妙：「我地啲老細賺大錢，我地都冇份嘅，龐大基建帶來嘅利益，唔多關我事。」香港之政見代溝好大，做得區諾軒爸爸媽媽有餘嘅王國興，葉劉淑儀見陳家珮輸咗，就話要DQ區仔，想啲年輕人歸心？幾難咯。