八方之前提過，有傳媒話，建制派有意喺下星期三嘅立法會大會上製造流會，圖阻區諾軒宣誓就任，立法會內務委員會噚日開會，泛民建制就事件針鋒雙方。人力陳志全就要求建制解釋係唔係搞流會，民建聯蔣麗芸反駁，叫主席問吓反對派守唔守規矩宣誓，最終要內會主席李慧琼打圓場收場。
陳志全話，聽到消息指有部份建制派議員會策劃流會，阻止民主派新議員宣誓就任。內會主席李慧琼即時澄清，話只係「傳言」，相信大家都希望議會暢順，議員可以盡快依法宣誓。
元秋一見有發揮機會，就即時要求主席代問，反對派議員守唔守規矩宣誓，會唔會講《基本法》唔容許嘅事。醒目嘅琼子見黨友撩交打咁，就即時打圓場，再重申希望議員可以盡快依法宣誓，仲即時進入下個議程，阻止咗一場大戰發生。