2018年嘅夏天就嚟到，本港一眾女士肯定會喺facebook打晒近況：「今個夏天我要減肥」等，但自己又要拎住杯雪糕起勢嗒，呢種減肥真係漫漫長路。
為何無端端講減肥？因為減肥一定要講體重，而講體重一定諗起「平湖之星」，事關早前騎師梁家俊起咗個大笨象花名俾佢，呢匹最新重達1,332磅嘅灰色大馬，噸位方面肯定香港之最，足足有梁家俊嘅體重11倍有多，真係冇得輸。
不過講鬥重，所謂天外有天，澳洲有匹嘅Kirahvi嘅兩歲雌馬，重量高達1,535磅，平湖仔要加埋前NBA球星高比拜仁一齊上磅，最後先能夠穩得住，唔知呢匹馬食咩大架呢？
不過，都唔夠世界擂台躉Holy Roller勁揪，喺一張等出閘嘅照片睇得一清二楚，明顯佢嘅身形大份過其他馬好多。
呢匹馬足足有成1,760磅，同架私家車差唔多重，但生得大份唔代表跑得慢，因為呢匹92年出世嘅戰馬，生涯25戰12勝，總獎金超過196萬港紙，真係睇得又跑得。