今次立法會補選，姚松炎輸咗九西議席，固然引起政圈同民主派議論，紛紛尋找「死因」，但港島、新東民主派候選人得票率亦下跌，就更令民主派擔心，難免有人猜測係咪民主派拉票不力？好似新東范國威咁，咖喱范喺石湖墟奪48%支持，叫做力保民主黨票倉，但支持率未過半，難免有人猜測係咪民主黨未盡晒力拉票？
民主黨新東立法會議員林卓廷就同八方解釋，其實咖喱范喺呢個站，已贏對手鄧家彪成近500票，民主黨亦已全力為咖喱范拉票，不過今次始終係補選，同大選係有分別，而且今次補選方國珊得票高，相信唔多唔少吸走咗一啲民主派支持者嘅票。