公子L去北海道滑雪，本來已經有事嘅一對膝頭，滑雪後更加痛楚，返到香港睇醫生，醫生鬧佢唔聽話，因為三年前醫生已經警告佢：「你打波（網球與高爾夫）多，以後最好減少傷膝運動，每日散步一小時就夠，尤其唔可以滑雪，否則傷咗就與人無尤。」但每年冬季，公子L就心思思去滑雪，忘記醫生所言，好彩醫生係港大同窗，否則醫生反面都似。
膝傷行路艱難，落樓梯更加冇命。呢日食飯之時，佢話去完北海道之後，到咗東京，一晚就走咗去青山表參道之間嘅Blue Note（肥仔K在專欄介紹過）聽爵士樂，以前膝頭冇乜事由地面行落B3（地庫第三層）完全冇問題，呢次就慘呢，要扶住樓梯扶手，逐步落，好辛苦咁行到B1，已有美女接待員走過嚟迎接，帶佢走出一道暗門，暗門後就有小電梯直落B3，於是精神好番啲，兩小時後，美女請佢簽單，原來已有不少人到收銀櫃枱排隊埋單，美女係職員，唔駛排隊，代埋單後又帶佢去搭𨋢上地面，代往衣帽間取大衣，送佢出門口搭的士，服務之周到，無微不至，而且全部係自動自覺提供，唔收貼士小費嘅，令公子L佩服到五體投地：「日本之服務態度，全世界第一。」我哋香港名店有冇咁一流嘅服務，唔敢講，若然有之，紅底一張作小費走唔甩喇啩，邊度會好似日本咁，不收貼士打賞㗎。
肥仔K不知何故，較早前乘電梯到達地面時，伸一步向前，聽到似乎係餅乾跌落地碎咗嘅聲音，左腳即時唔郁得，勉強單腳跳到花槽旁邊坐低打電話問阿媽好唔好call白車，阿媽喝住唔好，立即同菲傭帶埋輪椅趕至，飛的去睇家庭醫生，等咗一個小時，醫生話，我唔係骨科專家，不如去照咗MRI先，搵仁安醫生問吓，照MRI要五千五百元，咪嘞，立即打電話搵骨科聖手醫生陳，醫生陳在陸羽飲茶，即時應承下午見肥仔K，於是三點幾去到，醫生陳經驗豐富到極，摸兩下就知道係小腿肌肉撕裂，止痛消炎之後，約四個星期可以復元，醫生陳話：「好彩唔係斷筋，否則要施手術，肥仔K係太肥，減肥啦！」於是肥仔K要起碼坐輪椅四星期，令佢諗起：「香港食肆有冇Blue Note咁體貼服務呢？」難啲咯，無謂奢望，幸好仍然可以出席3月17日下午兩點半在尖沙嘴星光行誠品書店舉行之「笑看東瀛，新書分享會第二回」，與讀者互動。