【爆相爆片】現年28歲的陳嘉寶（Anjaylia）去年底下嫁初戀闊少黃頌祈，由拍拖到結婚都甜蜜爆燈。結婚不到半年，兩人依然處於蜜月期，更當街耍花槍兼玩角色扮演。
天后開餐
讀者潘先生透過本報「爆相爆片」報料，指日前晚上10時半左右，在銅鑼灣維園遇見穿短裙的Anjay，當時她跟老公拖手漫步行去天后，沿路有講有笑。但當行到網球場近廁所位置時，Anjay忽然變臉，甩開老公隻手，一副嬲爆爆樣，兼且撇下老公行先，潘先生說：「老公可能唔知講乜激嬲咗老婆啦，見Anjay行咗一陣就停低蹺住手，之後佢老公就示意行另一邊方向先啱，然後行埋去拖番老婆。Anjay郁一郁手想揈開，但佢老公捉到好實，之後佢哋就一齊行去天后食嘢。」
「陪我做戲」
Anjay事後回覆傳媒時否認跟老公吵架，她笑說：「冇嘢呀，我哋喺度玩！我好無聊，成日要佢陪我做戲，有時扮唔識，有時扮偶遇，有時扮嬲之類，我哋日日出街，都會扮鄰居或者速遞員傾閒偈。因為以前上戲劇班有呢個環節，𠵱家冇上堂咪叫佢陪我玩囉。」她自言貪玩，跟好友賴慰玲和蔡穎恩都有玩類似遊戲過，她補充：「屋企人同朋友都覺得我有精神分裂。」
Anjay拍攝財務公司廣告為人熟悉，因此有「邦民女」的稱號，之後獲邀演出過無綫劇集《女人俱樂部》演李若彤少女版，又跟鄭嘉穎和謝安琪合演過劇集《殭》。
採訪：嵐山