財政預算案預留咗10億元復修830幅閒置用地，以短租批畀非政府機構使用，但民間申請用呢啲閒置地過程好繁複，曾將中環電車路變行人專用區嘅非牟利機構「非常香港」，推出「非常協作（Collaborate HK）」計劃，邀請公眾為善用閒置地提供意見，例如美化樓下街道甚至共享房屋等構思都可以，仲請咗有份設計英國國王十字區（Kings Cross）重建項目嘅著名城市規劃師Peter Bishop來港分享經驗。
「非常香港」總策展人羅健中話，去年年底同30個團體討論，仲物色咗8幅適合推行社區項目嘅閒置地，包括西營盤西區副食品批發市場海濱地皮、鰂魚涌東隧出口上蓋空地、筲箕灣等，正探討該地用途。佢哋會喺本月23、24日舉行「Sandbox社區試驗工作坊」，冀吸納更多公眾意見，第二季向海濱事務委員會交報告，若獲政府支持，可盡快落實於一兩個地點試行。有意參加工作坊可到此專頁 http://fb.com/VeryHK/報名。