有爆炸頭之稱曼聯球星嘅費蘭尼，正因髮型夠奇特，令人印象深刻，以致球壇以外都可能好多人聽過佢個大名。
不過，費蘭尼最近突然玩變髮，幫雜誌《GQ Style》拍寫真，竟然將自己頭髮紮成兩個髻，成個米奇老鼠咁款，但成個造型真係笑死人兼幾核突，亦唔知GQ嗰班造型設計，點解會有咁嘅靈感，定特登玩佢。
不過更加令人覺得詫異，係佢影呢張相時著果件衫，竟然同加拉塔沙雷件球衣有相似，有棗紅同泥黃嘅元素；之前一直傳出費蘭尼今夏約滿紅魔後，就會去土超搵食，唔通呢件衫都暗示佢去嗰隊就係加拉塔沙雷？
其實，爆炸頭仲有一個綁起髮巾嘅造型，畀人話似曼徹斯特電視劇Coronation Street入面嘅角色Hilda Ogden，可能今次呢個主題係想扮一啲知名嘅角色造型，咁聽落有幾有噱頭。
其實，近20至30年嘅球壇，整過騎呢髮型嘅知名球星數之不盡，以下10位都曾經畀人笑過，或者就係因為呢頭髮型而舉世知名：
1.謝雲奴 - 用髮箍綁住前額，中間分界，但佢髮線一路向上移，其實咁樣整係唔畀人覺得自己脫髮。
2.沙格拿 - 同意中間分界，但兩側全部係一條條嘅金辮，有「高登仔」當年仲話佢個樣似台灣歌手陶喆。
3.碧咸 - 當年成日都有唔同潮頭出現，引領全球風潮，但亦曾經整過一個辮子頭惡評如潮，只可以話呢種髮型連咸哥都carry唔到。
4.朗拿度 - 在02世界盃留嘅經典河童頭，帶嚟好運捧盃兼做埋神射手，成一時佳話。
5.韋斯特 - 呢位尼日利亞球星最令人記得，就係佢呢個綠色辮子頭。
6.華達拉馬 - 呢一個金色掃把頭，令佢贏得「金毛獅王」美譽。
7.查馬克 - 同樣遇上「中年危機」，個頭堆埋中間好似一堆雜草咁。
8.基奧雲尼施蒙尼 - 呢位名將之後竟然曾經梳過一個嚇死人嘅日本武士頭。
9.尼馬 - 初出道時整過雞冠頭，但前面又留齊蔭，成個髮型同佢面形完全唔襯。
10. 98世盃羅馬尼亞全隊 - 當年佢哋在分組賽晉級16強後即全隊染金，點知16強對住克羅地亞即被淘汰出局。