隔牆有片:養「狗」三年 始知係熊屬二級保護亞洲黑熊 內地男養出感情冇上報 - 李八方

隔牆有片:養「狗」三年 始知係熊
屬二級保護亞洲黑熊 內地男養出感情冇上報 - 李八方

熊同狗都唔識分,到底真唔真?話說3年前,麗江楊男喺山邊執到一隻「小狗」返屋企養,仲取名「憨憨」,但至「憨憨」長大約到半歲時,開始有異,除咗好食得,長相都同狗狗越嚟越唔似,睇落更似熊,呢個時候楊男先意識到佢嘅「真面目」,對佢加強看管措施,用鋼筋做咗一個籠,將佢關起嚟。其後佢終於知道,呢隻係二級保護動物亞洲黑熊,但因為養出咗感情所以冇上報。

憨憨漸漸長大,露出「真面目」,主人後來惟有以鋼籠將佢關起。互聯網

稱撒嬌黏人通人性

咁點解有人知道佢家有黑熊?原來有網友喺朋友圈,發佈咗有村民養黑熊嘅照片同相關訊息,引起當局關注,結果就有警方搵上門。其實飼養呢隻家陣體重近80公斤、高度1.7米嘅憨憨,其間有冇乜怪事發生?原來憨憨發情過一次,當時脾氣好暴躁,但從未傷人,楊男仲話,「有時候還會和我撒嬌黏人,把手放到牠嘴邊也不會咬,舔舔我和我玩鬧,跟家裏狗一樣,也通人性。」而憨憨喺9個月大嘅時候,都成日同佢屋企嘅狗狗玩。
雖然楊男嘅行為屬無馴養繁殖許可證馴養繁殖野生動物,但佢對熊冇傷害行為,喺警方調查過程中積極配合同願意將黑熊移交,公安機關最終據《雲南省陸生野生動物保護條例》第22條第4款規定,對楊男提出沒收所飼養嘅野生亞洲黑熊嘅處罰。其後永勝縣森林公安局將黑熊移交麗江市林業局野生動植物保護管理科,憨憨暫時被寄養喺玉龍縣鳴音鄉嘅野生動物養殖基地。

李八方

小時憨憨十足Teddy Bear咁可愛,與主人家中小狗打成一片。