田泰安係咪好騎師？今季已有34Win排龍虎榜第三位，整體表現當然甚佳啦！而梁家俊又係咪好騎師？有名你叫華將一哥，騎功亦梗有料到，但雷神莫雷拉一出誰與爭鋒，周日(18)雷神停賽期滿復出，便立刻奪去一匹近兩仗由田泰安、梁家俊操刀的馬，話騎就騎，其他好手邊有咁嘅地位呀！
所講的是列陣周日三班1200米草地賽，葉楚航馬房的「深愛」。此駒前仗1400米用田泰安搏輸得季軍，上仗谷草1200米換梁家俊，名次更倒退至梗頸四。今次想收復失地有乜方法呀？一是回跑唯一勝途田草1200米，第二亦是最重要一環，梗係用番贏馬拍檔雷神啦！
記得「深愛」贏馬之役，所擊敗之亞軍是「財高八斗」，其後「財高八斗」接連交出佳績，升至目前二班85分，「深愛」今次在三班負115磅，再加埋重新和雷神合體，看來戰鬥力即時提高唔少。