對男士嚟講，「扯唔起」確實好棹忌，何況係男子漢警察？網上熱傳一條交通警多番扶起翻側鐵馬不果嘅短片，片中可見呢名交通警嘅鐵騎向右翻側倒卧馬路中央，警員喺車身右邊，雙手托住車身嘗試推起，但多番嘗試都唔成功，片中有女聲更問：「嘩，好重㗎架車？」後來有熱心市民上前相助，喺鐵馬另一邊拉起，可惜鐵馬都絲毫不動。
網民貼片教正確方法
唔少網民留言剝花生，話「警察哥哥想幫手要開聲嘛，如果唔係一陣間又告我毀壞公物」，又質疑警員體能差，有人仲講笑話係周星星（《逃學威龍》周星馳角色）拍緊戲。但都有網民好體諒，話架電單車重量達二三百公斤，加上自身裝備唔少，無力扶正鐵馬都情有可原。
亦有網民好有心，貼上其他影片教點樣正確扶起電單車，話警員應背向車身，一手抓住手柄，一手抓住車身如座位扶手，踎低再以背脊及下肢力量輔助推起，原來警方過往都有拍攝過短片，片中交警側身踎低，雙手抓住扶柄，以下盤力量一把就推起翻側嘅鐵馬，對普羅市民嚟講，今次都算長知識。
識睇睇留言
Dannykktsang Tsang：警察都係人，唔識唔緊要，最緊要肯學達者為先
畢思索：係咪周星星拍緊戲呀！??
John Lam：喺側邊只係笑唔幫手嗰班，全部拉晒告辱警罪。
Wing Chow：可能跌嗰吓拉親肌肉，會短暫腳軟
資料來源：《蘋果》網頁