現屆副局長中有位喇沙仔；老闆由蘇錦樑變成邱騰華，商經局陳百里（Bernard）喺娥特時代由政治助理升呢做副局長，掌管商務及旅遊嘅佢極愛科研，仲試過同朋友創業，開設生物科技公司。
遇陳鑑林開啟從政路
77年出生嘅Bernard細個住旺角，小時最鍾意跟住爸爸到麥花臣球場踢波同打籃球。Bernard幼稚園至中一讀培正，中二考入喇沙，中六後就到美國杜克大學（Duke University)，獲授電機工程學士同生物醫學工程博士學位。佢做喇沙仔期間，加入網球校隊同英文辯論隊。
點解揀讀生物醫學工程和電機工程？佢話爸爸係工程師，所以由細培養對電子電路嘅興趣，個人亦對生物醫藥感興趣，加上一直以嚟化學科成績較好。而喺大學二年級暑假，佢入咗一個著名嘅科研團隊實習，啟發對科研啲興趣，亦決定之後讀博士，希望研發嶄新產品。
回流香港發展後，佢喺一間上市藥廠做過科技總監，其後又同朋友創業，開設生物科技公司，佢話其中一個比較有趣嘅項目係同玩具商合作，將自家研發嘅藥物傳輸技術結合至一種玩具膠，集合玩樂同藥物功能，亦結合咗兩者市場同各自優勢。有次參與社區活動識咗民建聯前立法會議員陳鑑林，其後入咗民建聯，2007年當選觀塘區議員，開啟從政之途。
