兩會會期仍然繼續，嚟緊星期日就會選舉新一屆全國人大常委。身為十二屆全國人大常委范徐麗泰喺北京話呀，根據以往經驗，獲提名為香港同澳門常委嘅人，都有好大機會當選。
雖然范太冇講明，邊個港區人大獲推薦為人大常委，但政圈個個皆知，前民建聯主席譚耀宗去年底參選人大，查實都係部署接任范太，譚耀宗幾乎一參選人大選舉，就篤定係新任人大常委。
范太話喎，希望新一屆代表香港嘅常委呢，可以擔當國家同香港之間嘅橋樑，向市民講解國家政策，亦代香港市民反映感受同想法，仲相信嚟自香港嘅常委，會令人覺得「深慶得人」。唔知普羅市民，又認唔認同？