曼城禮拜一英超作客靠大衛施華梅開二度，2:0輕取史篤城，揸住16分優勢進入最後八輪英超，咁橋喺現有賽程之下，曼城兩輪後會主場對二哥曼聯，喺曼市打吡贏波就提早封王，隊長高柏尼好興奮咁話呢個劇本係一生人一次咁完美，間接呼籲紅魔下場鬥史雲斯唔好甩轆咁話！
曼城贏多三場就掂
曼城今場有阿根廷射手阿古路因膝傷缺陣，所以膝部韌帶受傷唞咗兩個半月、上個禮拜先喺歐聯對巴素利復出嘅20歲巴西新星「耶穌仔」加比爾捷西斯，有得連埋費蘭甸奴同史達寧兩個傷癒嘅隊友一齊踢番正選。曼城今場都無驚無險，10分鐘大衛施華接應史達寧嘅傳送射入先開紀錄，換邊後五分鐘，大衛施華就接應「耶穌仔」助攻再建一功，曼城順利以2:0擊敗尾二嘅史篤城，取得英超四連勝。
藍月以81分繼續大幅領放，領先第二位嘅曼聯16分，數字上贏多三場就可以提早封王。不過，由於咁啱喺現有賽期下，曼城同曼聯下輪對愛華頓同史雲斯，只要大家拎嘅分數一樣，再下一場四月七號上演嘅曼市打吡就係六分波，曼城贏埋就可以喺主場登頂。溫馨提示番，由於嚟緊呢個周末踢英足盃八強，所以英超有六輪改咗期，暫時未知幾時補賽，不過就影響唔到曼城嘅封王大計。
高柏尼好興奮咁話：「每個喺曼徹斯特嘅藍方代表，都好清楚呢個咁完美嘅劇本，係一生人一次嘅機會，我哋要好好把握。」
領隊哥迪奧拿就唔理咁多，只係話知道贏多兩至三輪聯賽就會封王，就係咁簡單，而哥帥今場亦按英格蘭足總規定，比賽期間除低咗胸前嘅黃絲帶，務求唔好因為自己立場而影響到曼城。