有踢過草地嘅波友都知道，畀波砵嘅釘踩到係有幾痛。而周日葡超就出現所有波友都好驚嘅一幕，周日葡超球隊樸迪莫倫斯主場迎戰甘馬雷斯，比賽踢到30分鐘，主隊中場法比斯奧為咗接應隊友後場嘅直線衝前，客軍門將杜格拉斯連拿度同時出迎，禁區外一嘢就踩咗落去法比斯奧腹部位置，認真恐佈。
法比斯奧被踩之後當然就痛到攤咗喺地下上面，更恐佈嘅係，法比斯奧大髀就留咗個一蚊銀咁大嘅釘窿，當然要即刻抬離場醫治。出咗一記收山腳嘅客軍門將杜格拉斯連拿度，居然仲覺得自己係無辜，猛向球證耍手擰頭，好在球證都明察秋毫，即刻向佢出示紅牌，將佢趕出場。