喺香港政壇要撈得掂，務必記住四粒字：「政治正確」，尤其係當阿爺已經開晒聲、畀晒方向建制派去跟住，自必要跟到實一實，行歪咗少少都好大鑊，身為行政會議成員嘅新民黨主席葉劉淑儀，喺呢方面就好傑出，噚日仲大發神威，當面點醒運輸及房屋局局長陳帆，香港係司法獨立而唔係三權分立！
習帝曾提合作論
咦，香港唔係三權分立？冇錯，以前大家所認知嘅係，香港行政、立法同司法，三權分立，互相制衡，之但係時移世易，回歸後一切都唔同晒。習帝早喺2008年以國家副主席身份訪港時，已經提出「三權合作論」，2014年再嚟料，國務院推一國兩制白皮書，話法官要「愛國愛港」，建制派從此將「三權分立」釘蓋，一味重申香港行政主導，司法則係獨立。
呢啲咁重要嘅中央指導思想，特區高官冇理由唔掌握；點知噚日一地兩檢法案委員會開會期間，運房局局長陳帆回應有議員批評一地兩檢違憲之時，竟然話香港係「三權分立」，指若有人認為安排違憲，可以尋求法院裁決。但佢一講完「三權分立」，身為委員會主席嘅葉劉即刻插嘴更正話香港唔係「三權分立」，只可以話司法獨立，強調呢個係好重要嘅憲政概念問題。被葉劉「當頭棒喝」嘅陳帆，惟有面帶尷尬繼續回應，唔敢再觸碰呢個話題。
李八方