曼聯36歲元老級中場卡域克，上月已經俾領隊摩連奴提早公佈佢季後退休嘅消息，指佢季後會轉做一隊教練，而卡域克禮拜一亦都正式確認呢個消息（圖），佢嘅12年曼聯生涯同19年職業生涯將畫上句號。卡域克出身於韋斯咸青年軍，04年轉投熱刺，06年以1,800萬鎊加盟曼聯，效力至今各賽事上陣463場入24球，亦曾34次代表英格蘭大國腳。今季初卡域克經歷心律不整而長唞，各賽事只上陣四場。
另外，曼聯青訓翼鋒拉舒福特上禮拜六英超雙紅會梅開二度做埋最佳球員夠威水，仲送咗個獎畀阿媽，夠晒孝順，而嗰場波有份講波嘅前水晶宮主帥法蘭迪保亞就話好遺憾福仔跟住摩連奴，當然辣㷫方丈啦，摩佬抽水反擊：「英超史上最差領隊法蘭迪保亞，七場輸晒零入球。如果由佢做福仔領隊，福仔會學識點輸波，因為佢輸晒所有波。」