利物浦上周六英超作客1:2不敵曼聯，擔任評述嘅紅軍名宿加歷查賽後揸車走時因不堪被另一車輛上嘅「魔迷」嘲諷，竟然吐口水並且令對方車上一個14歲女童中招，知衰嘅佢周日立即公開道歉。英國《鏡報》上載嘅影片顯示，加歷查賽後揸車走時，旁邊一架車嘅曼聯球迷高叫佢嘅名，車上仲有佢嘅14歲女兒，當加歷查校低車窗後個「魔迷」即大聲提到2:1嘅比數幾次，加歷查就憤而向對方車窗方向吐口水（圖），而14歲「小魔迷」就話口水濺到佢前額而令佢喊咗出嚟。加歷查周日就打電話向該對父女道歉︰「我只想道歉，希望你冇事」，個細路女亦回應︰「OK，多謝你嘅道歉。」不過，加歷查今次隨時有手尾跟，佢任職嘅Sky sports電視台已勒令佢冇得做周一足球節目，隨時冇得撈。