熊黛林（Lynn）前年同家族坐擁百億資產富二代郭可頌結婚，婚後即密密睇中醫調理身體趕造人，上年終於成功陀B，預產期喺5月。唔少孕媽都鍾意影大肚相，Lynn嘅BB就嚟出世，佢同老公最近都影咗輯大肚相，Lynn話：「影呢輯相係諗住第時個小朋友講起，可以拎呢啲相出嚟，同小朋友講爸爸媽媽係好期待BB出世。」
Lynn雖然肚凸凸，不過手腳仍然纖瘦，而上圍就明顯升cup，至於準爸爸郭可頌心情當然興奮，Lynn開心話：「老公一直都好照顧我，有咗BB之後，老公仲更加係事事以我為先，我覺得好開心，睇得出自己真係冇嫁錯人。」
湊B請教朋友
講到BB就快出世，Lynn𠵱家嘅心情仲未係好緊張，反而好期待，同埋有啲唔捨得同BB身心相連嘅親密關係，佢話：「每次BB喺我肚入面郁，我都好興奮。」問到有冇睇書學湊B同教小朋友技巧？Lynn話：「只係睇過啲關於育兒嘅書，之前都有請教過啲有湊B經驗嘅朋友，但我哋都係想順其自然，第時再一步步學，唔想畀太大壓力屋企人同BB。」
撰文：馮仁昭