熱刺喺周日英超作客般尼茅夫反勝4:1，超越利物浦升上第三位，一洗上禮拜歐聯出局嘅頹風，但最慘係當家射手哈利卡尼30分鐘右足踝被踢傷出，完場後仲俾人影到右腳要着保護靴兼撐拐杖先離開到球場，英媒估計佢足踝韌帶受傷，同年半前嘅患處一樣，當時要唞七個禮拜，今次仲話隨時危及世盃，英格蘭真係閉翳。
神射手賠率沙拿成大熱
熱刺今場七分鐘已經失波，然後30分鐘卡尼喺越位情況下入咗波，球波當然唔計，而且佢仲同門將比高域相撞後倒地傷出，好彩熱刺35分鐘靠迪利阿里追平，仲有近期好勇嘅孫興民喺62同87分鐘連入兩球，加埋右閘奧里亞補時埋齋，熱刺大勝4:1係今季英超第一次先落後下反勝。
不過，24歲嘅卡尼賽後被影到撐拐杖離開球場，右腳仲着咗保護靴。領隊普捷天奴好擔心咁話卡尼周一會做檢查，不過冇咗呢個今季英超入24球、各賽事入35球嘅王牌射手，熱刺爭前四嘅前程即刻蒙上陰影。英國《鏡報》話，初步診斷卡尼係足踝韌帶受傷，同佢喺2016年九月對新特蘭時所受嘅傷一樣，當時佢就唞咗七個禮拜，如果今次一樣，卡尼就要到四月30號對屈福特嘅聯賽先可以復出。《鏡報》仲加多句，話如果檢查結果係更差，卡尼隨時未必去到俄羅斯幫英格蘭踢世盃，之前仲傳領隊修夫基想搵卡尼做隊長，家陣英軍同熱刺真係一齊擔心。
另外，卡尼本來喺英超射手榜同利物浦翼鋒穆罕默德沙拿一樣係24球排第一，不過根據足智彩嘅賠率，沙拿即刻落飛到1.72倍，而原本嘅大熱嘅卡尼就上番2.45倍。