唔係講笑，真係唔好睇小女人，尤其係選戰中。咪以為講緊以777票當選特首嘅林鄭月娥，皆因網上近期最搶鏡嘅，其實係新東補選參選人陳玉娥，睇番戰果，選舉當日零拉票，最終卻攞到1,504票，比2016年新東大選時嘅486票多出成千票，都算勇奪今屆選戰飛躍進步獎。可能娥姐都對戰績好滿意，喺點票中心表現興奮，其間仲多度喺台上亂入其他團隊，搶鏡片段喺網絡廣傳，唔少網民都發出會心微笑。
講真吖，娥姐真係幾有台型㗎，通宵到票站時，戴住一副黑超，濃濃散發一種「星」味。至於佢喺扑咪期間講啲乜，真係唔多重要，因為聽完大家都一定唔知佢噏乜！其後佢喺現場滿天飛，喺新東候選人上台聽取結果時，得票最低嘅佢高舉V字手勢畀大家影相，笑得仲燦爛過范國威，唔知仲以為佢勝出。
亂入團隊大合照
之後佢繼續嚟料，九西宣佈選舉結果後，勝選嘅鄭泳舜（胡杏兒姐夫）自然同民建聯及工聯會領導同助選團喺台上謝票，點知呢個時候，娥姐施施然上台企喺側邊，繼而同團隊一齊鞠躬，台上人當時都有啲愕然，但可能更難嘅係忍笑！之後團隊selfie合照，娥姐繼續緊守崗位，攝咗側邊個位影埋一份，韌力可嘉。
唔知係咪因為楊岳橋已名草有主，娥姐似乎已經移情別戀，喺票站期間不停喺阿舜身邊擾攘，立會新貴阿舜真係艷福無邊嘞！
識睇睇留言
Stanley Chow：娥姐貢獻了很多娛樂給香港人，值得一讚。
馬中堅：難得佢自我陶醉！
WA Hellen Morgan：娥姐不愧係網絡紅人，今次有千五票，進步神速，不要灰心，下次再選，或者有二千票。
Ree Ga：得票多過皇帝？仲唔跪安？？？
資料來源：《蘋果》網頁
李八方