曾鬧出易手風波嘅中環海濱摩天輪上年12月重開，票價由之前100蚊大幅劈價至20蚊，似乎成為唔少港人同遊客嘅平遊好去處。摩天輪新營辦商TECL賓客服務部主管羅智豪話摩天輪重開3個月以嚟，錄得50萬人次乘坐，噚日仲特意邀請第50萬名客人，一家六口免費乘坐摩天輪。佢話早前聖誕節同農曆新年係高𥧌期，載客量達至飽和，最多每日有一萬人次乘搭，成績較預期好，甚至超越上一個營運者。
羅智豪話受惠於政府兩蚊乘車優惠等，吸引唔少一家大細到場，有64%乘客同家人一齊坐摩天輪，但同女友嚟嘅乘客就只有7%。做唔到拍拖勝地，更有9%乘客係獨自一個嚟坐摩天輪，果然係「其實自己一個更開心」。
若以地區劃分，乘客當中有79%係港人、10%係內地旅客，其餘係國際旅客。佢話暫未有收支平衡等資料，重申3年內唔會加價。