雖則3.11係補選投票日，但地球仍然如常運作。好似香港電台逢周日嘅王牌節目《城市論壇》依舊繼續，今集題目係「廢紙圍城」，民生議題喎，唔太政治化，真係啱晒大和諧氣氛。但睇真啲，點解主持男變女，由陳月慧擔大旗，蘇敬恆去咗邊？
原來《城壇》前日已經喺facebook預告，噚日由陳月慧主持，仲同時附上陳、蘇嘅一問一答。陳月慧問：「3月11日有乜野（嘢）最重要？」，蘇敬恆就答：「投票，同埋……收睇由你陳月慧主持嘅城市論壇啦！」帖文仲附有政府呼籲補選投票嘅橫額，好有公民責任。
蘇B盛傳因為建制派篤背脊，指佢係民主派而喺政助遴選中落馬，呢次又喺3.11被換馬，唔少人猜疑有冇政治干預？最可圈可點係，《城壇》fb小編留言回覆時解釋，「同事有時會分擔唔同工作崗位，下星期日蘇敬恆同大家見面」。
稱分身不暇 休息一集
不過八方了解過嘞，蘇B噚晚有特備選舉節目要主持，可能因為分身不暇而喺中午稍稍休息，況且佢之前都主持咗幾個選舉論壇，休息一吓都好重要。唔知咁樣算唔算，真相大白？
李八方