滿佈抹黑嘅選舉氣氣之下，亦有啲甜蜜蜜嘅感覺調劑一下。新民黨呢次補選派出葉劉淑儀愛將陳家珮喺港島區出選，雖則民主派選情佔優，但該黨都盡地一煲，除咗主席葉劉，各黨友都瞓身支持，例如容海恩，可能都希望議會內多個黨友支持，更加出盡力撐撐撐！
有咩方法拉票時夠搶眼？孖住緋聞男友出動不愧為好方法。恩恩豬噚日一朝7點半殺入鴨脷洲海怡社區會堂陪陳家珮投票，同行嘅仲有新民黨政策總裁袁彌昌，二人穿深淺藍情侶裝配白鞋。袁彌昌都係新民黨職員，幫忙助選都唔特別，但又唔好忘記，據聞佢同容海恩撻着咗，已經蜜運一段日子，睇相見到恩恩豬笑得甜絲絲，似乎拍住拖助選，不失為愛路上難忘事件。