隔牆有片：
證婚律師做埋新郎嗰份 - 李八方

時下唔少人結婚，唔再去婚姻註冊處簽字，而係喺婚禮飲宴當晚一take過搞掂，由律師到場證婚，同親友一齊見證新人正式成為夫妻嘅浪漫一刻。而證婚律師嘅表現，喺當場確實好關鍵，稍有差池可能會有反效果。
婚禮攝影師Terry L近日喺facebook分享一段44秒嘅新人宣誓同簽字時嘅剪輯影片，就因為當晚證婚律師表現惹嚟熱議。片中可見當新娘子預備讀出結婚誓言一刻，淚珠徐徐落下，而疑與其身貼身嘅律師即刻喺耳邊深呼吸，並帶笑叫準新娘，「得唔得？慢慢嚟」。簽結婚證書時，男律師就出手幫忙準新人擺好手勢影相。

網民話似癡漢

呢種親密度，唔係人人受落。Terry喺帖文指，「影咗咁多年真係未見過咁『細心』的律師」，唔認同律師喺宣誓期間「貼住新娘企」，又話簽字時只須提點兩人牽手，根本唔使出手幫忙。
網民對律師呢種貼心表現意見兩極，有人覺得「好變態」，有人話「似痴（癡）漢」，亦有網民撐律師，覺得佢非常專業，話對住鏡頭一定笑啦，可能片中拍攝角度令佢變得奇怪。