曼聯嘅36歲前鋒伊巴謙莫域今季嘅重要性大幅退減，而且佢仲膝傷纏身，今場賽前佢只係回復輕量操練，所以肯定冇份，而且領隊摩連奴話佢季後會走人，預計佢都係去美職聯落班。雖然冇得踢，不過伊巴上個禮拜五就揸架成21萬鎊（約230萬港元）嘅新波子超跑返去卡寧頓訓練場，呢架車最高速去到每小時340公里，而且由靜止加速到每小時100公里只係要2.8秒，伊巴係型嘅。