【閃耀人生女人心 張天愛系列之4心存感激】
現年58歲的張天愛先後有四段婚姻，最哄動的要數她跟林青霞現任老公邢李㷧的一段情，兩人女兒邢嘉倩（Claudine），今日亦已為媽媽。
「青霞好女人」
張天愛和邢李㷧87年在香港舉行盛大婚禮，被喻為童話婚姻，那年張天愛26歲，但她與邢李㷧的夫妻關係僅維持了幾年，因性格不合分開。邢李㷧之後娶林青霞，而對方亦成為邢嘉倩的繼母。張天愛曾不止一次公開多謝林青霞為她養大女兒，她受訪時曾講過：「林青霞係百分之百嘅好女人，我同佢不存在情敵嗰層關係，佢對我前夫非常好，對我個女都好好。」二十年過去，張天愛依然心存感激：「𠵱家好少聯絡喇，阿女大咗之後，佢有自己家園，自己嘅小朋友。我好多謝青霞，畀咗一個咁溫暖嘅家佢，畀咗兩個妹妹佢，所以，邢李㷧對我嚟講，都係一個福，一個積福，佢有咁好嘅老婆。」
「嘉倩叻過我」
女兒邢嘉倩轉眼已三十歲，現時亦懷有第二胎，張天愛已升格做外婆：「對我嚟講，Claudine係十個小朋友嘅能量，佢可以幫爸爸好多，又管自己嘅學校，好百變，佢一時講地產，一時講買畫，一時講小朋友，一時講廚房買菜，佢好叻㗎。我哋乜都傾，千祈唔好教佢，因為佢叻過我。」
採訪：林妙萍
攝影：郭賢興