律政司前司長黃仁龍呢排好紅，因為高院法官陳慶偉喺煲呔案訟費判詞狠批煲呔安排公關搵名人到庭支持，以影響陪審團，黃仁龍即刻發聲明反駁法官，澄清係自發到庭，唔少人都大讚黃仁龍好型有義氣。呢位義氣大狀噚日出席香港浸會大學校慶酒會並致辭，當然冇提煲呔案，亦冇回應會否追究，主要都係寄語年輕人，表達意見時要尊重他人及有同理心，追求正義必須喺法律框架下進行。
黃仁龍致辭提到，香港近年捲入不同法律同政治爭議，大學都唔可以置身事外，更往往處於戰線之上。繼而冇點名咁話，雖然《基本法》保障言論自由，但學生對正義同自由嘅追求，仍須受法律規管，仲引述未做律政司前曾處理一宗案件，指有學生無禮對待老師，不服校方處分上訴但被駁回，佢由此指，不論個人背後理據點，都要尊重別人。
佢亦提及終院對政總東翼前地案嘅判詞，話公民抗命動機可以係法庭考慮因素，但過程必須和平非暴力，呼籲學生對不公義發聲時，都要尊重別人同抱有同理心。
錢大康送高帽
緊接黃仁龍發言嘅浸會大學校長錢大康，向對方大送高帽，話自己係第二次有幸親耳聽到黃仁龍演講，指黃仁龍以法律角度講解事件，佢通常只係懂兩成內容，但仔細重聽後對佢啟發好大，同意大學要維護學術自由，不應盲目被政治立場左右喎。
活動完結後，記者再追問準備離開嘅黃仁龍，但佢就冇再就煲呔一案回應嘞。
李八方