劉浩龍下月27號喺旺角麥花臣場館舉行個唱，早前佢喺觀塘接受訪問時話 ：「由1月尾開始我已經喺健身教練督促下，密密練習，每日起碼跑八公里然後再做gym，飲食嘅餐單上只得菜、雞胸、蛋白同魚四樣嘢。」佢表示教練有兩位得意門生，一個叫張家輝，一個叫彭于晏，佢話：「相信我好難超越佢哋，但我都唔可以失禮教練。」
冇諗過紅館
今次演唱會劉浩龍講明冇嘉賓環節，所以一定唔會見到容祖兒：「相信入場嘅觀眾都唔介意睇我耐啲。我唔會想將啲舊歌改得太犀利，希望觀眾一聽到首歌嘅前奏就有番嗰份回憶喺度。」今年除咗做演唱會，亦會炮製新歌，喺過程中搵番好多初出道做歌手嘅回憶，劉浩龍話：「所以我同公司講，今年希望全力做音樂工作，雖然中間我要去拍電影，但我都好希望年尾可以出席頒獎禮。」 今次選址旺角麥花臣，劉浩龍有冇諗過去紅館？佢話：「其實冇，我份人一向都好知道自己位置，我唔想人哋話『好啦，還你心願幫你開一場。』我希望大家真係滿意我演出，有口碑、有成績我先至會再考慮。」
撰文：馮仁昭