星期三北區嚴重塞車，數以千計市民喺車站打蛇餅排隊等車，有巴士乘客更寧願落車，沿粉嶺公路路肩步行離開，角逐新界東補選議席嘅工聯會鄧家彪，對小市民受塞車之苦表達無限同情，就喺塞車期間，在fb發文溫馨提示居民交通情況，話根據運輸署網頁訊息，今次上水大塞車是因為車多關係，令北區居民經常受塞車之苦。
鄧家彪咁貼心，網民卻似乎唔多領情，留言質疑鄧家彪呢個「大發現」，指「Wa！真係唔講都唔知塞車因為車多呀！」亦有人指「呢個真係世紀大發現呀！下屆諾貝爾獎仲唔係你拎！」
比較感恩嘅市民，就話「好彩你話我知塞車原因，我諗左成晚都諗唔到，搞到瞓唔着。」而似乎係工聯會支持者就大讚：「彪哥，你真係做實事嘅人。你唔講，邊有人會諗到塞車會係因為車多。另外，我相信佔中嘅蝴蝶效應都係其中一個原因。」獲得咁多市民熱烈回應，八方相信如果鄧家彪補選勝出，原因一定係選票夠多！