公民黨立法會議員噚日同傳媒舉行新春團拜，不過八方估唔到團拜嘅焦點並唔係公民黨議員同傳媒、市民拜年，而係黨魁楊岳橋（AY）竟然想打郭家麒，仲燒埋去AY嘅「閨房私密」。
不停被催生 面都紅晒
話說團拜期間，幾名議員應傳媒要求大合照，呢個時候AY竟然作勢要打郭醫生，究竟發生乜何事？原來正當AY諗緊講咩新年賀辭，郭醫生突然高喊：「楊岳橋生仔咪得囉！」嚇到AY當堂大嗌：「唔好亂噏啊！郭家麒！」
不過郭醫生並冇放過佢，再加多一句話：「咁或者生囡囉！生孖胎都得！」激到AY紮紮跳！到AY同傳媒食飯傾偈，當講到唔少傳媒都關心新婚嘅AY，幾時再有好消息公佈時，同枱嘅郭醫生又加把口，仲不忘製造懸疑笑笑口話：「佢（AY）有冇帶楊太出嚟畀你哋見？佢𠵱家可能唔方便呢？」暗示楊太有喜咁，搞到AY即時面都紅晒，再三強調自己真係冇生仔計劃。
呢個時候郭醫生仲唔放過AY，聽到AY咁講再搭嘴，話相信傳媒關心AY係有心無力？定有心有力？今次郭醫生燒到AY閨房私密，AY梗要即刻反擊！佢好堅定話呢啲問題只會對一個人負責，話呢啲無謂喺傳媒面前披露，佢仲加多句亦冇必要喺大家面前吹噓自己喎！
李八方