【動人心言】司機嘅駕駛態度，總會成為惹火嘅城中熱話！成日話「顧客是對的」，香港充斥住投訴文化，而司機，都係被投訴對象之一。最近，乘客似乎先開始意識到，自己寶貴嘅性命係掌握喺司機手上，變得體諒有禮。乘客固然要踏出一步，而有位司機，好早就為乘客行多步。
吳錦泉，71歲，揸咗新界的士11年，佢知道o依家啲人成日嗌的士司機做DC9，好希望改變外界對呢個行業嘅睇法。泉哥為咗令乘客有開心難忘之旅，喺2014年開始，新年着上財神服，又親手佈置車箱，過年、情人節、元宵、復活節、中秋節、聖誕節等仲會定期更換，一上車就感受到歡樂嘅節日氣氛，咩怒氣都無晒啦！
「呢度叫西霸，左手邊係萬宜水庫！」去西貢區玩，可能會捕獲泉哥，佢尤其鍾意揸入去萬宜水庫嗰段路，沿途仲會一路做介紹。
最近動主播阿仙有幸坐上財神的士，由泉哥帶路遊車河。沿途有人見到「財神爺」經過，都會好開心咁嗌：「嘩！財神爺呀！」真係由心笑出嚟！泉哥話好記得載過一位乘客，佢全程車都無出聲，就喺落車前，拍咗泉哥膊頭一吓，豎起手指公，泉哥認為呢個動作係「拍膊叫絕」！
喺遊車河嘅途中，都有唔少人想截財神爺嘅的士，泉哥話萬宜水庫呢度，好多時都call唔到車，甚至有「泥鯭的」劏客，「有乘客同我講，出北潭涌最高紀錄要$150一位㗎！」如果係五座位的士，一程車就收$750，相比原本$76收多十倍！泉哥都鬧，「嗰啲正式DC9（的士狗）！」泉哥為咗唔使乘客捱貴車費，佢會特登「冚旗」入去載客，話就算去程蝕都無問題。
對於最近巴士司機同乘客之間發生嘅衝突，泉哥話佢判斷唔到邊個啱邊個錯，佢講返作為的士司機嘅經驗，話有時為咗搵食真係會煩躁，但係有時係啲乘客令司機煩躁。泉哥分享，「遇過需要乘客帶路嘅情況，佢就鬧：『你唔識路！揸咩的士呀？』」又話以前啲客落車都會講「唔該」，而家無都不特止，仲「嘭」一聲好大力閂門，慨嘆話：「感覺真係唔同咗！」事實上，做司機都需要EQ高，泉哥就話會聽音樂嚟舒緩情緒。
泉哥扮咗四年財神，話諗返最初都鼓起咗好大勇氣，「我第一年着起財神服，戴晒鬚，真係唔敢出街！」佢話坐咗喺的士度10幾分鐘，諗吓自己為乜要咁做，諗清諗楚自己唔係古靈精怪，唔係去呃人，係想帶歡樂畀人，就鼓起勇氣揸架車出街！
靠一鼓勇氣踏出一步，着上一套財神服，令泉哥儲咗好多，同乘客之間嘅開心回憶，證明搵食嘅同時，都可以贏得快樂。
旁白：Roy
主持、撰稿：阿仙
攝影：江俊豪、區民傑、王心義
航拍：Sami Lee、江俊豪
後期：Sami Lee
編導：Sami Lee
編審、監製：Kaman