財爺陳茂波喺預算案宣佈派海洋公園門劵，外間有唔少批評聲音，海洋公園亦難免會中箭，不過就冇影響大型活動，好似周末起搞嘅歌酒節，除咗有Shine、RubberBand表演，仲有美酒佳餚，當中包括過百款啤酒，仲有海洋公園限定手工啤。
啤酒達人黃思偉話，海洋公園特別同本地手工啤品牌HEROS BEER CO.合作，推出會場限定香橙雪條忌廉啤酒手工啤，500毫升賣48元，靈感嚟自釀酒師重遊海洋公園勾起嘅兒時回憶，細個食嘅香橙雪條別有風味，所以以橙汁、雲呢拿豆調出味甜少澀嘅手工啤，只喺海洋公園發售；佢話由於酒本身味道中性，適合配烤雞、味道唔太重嘅食物。
台灣廿四節氣手工啤登陸
另一款「台北啤酒頭」嘅品牌，由啤酒書作者、釀酒師，同鍾意儲存酵母嘅朋友創辦，帶嚟廿四節氣手工啤，其中一款叫白露嘅新英倫印度淡啤，就適合配刈包一齊食。海洋公園歌酒節將於3月10日起至4月2日，連續4個周末及復活節長假舉行，入場費50元，另有180元及280元套票。