講起攻打四方城，八方都心癢癢，有時唔係旨在輸贏，而係邊打雀邊吹水嘅愉快滋味！三位政壇元老級人馬，包括自由黨創黨主席李鵬飛、民主黨創黨主席李柱銘同民建聯創黨主席曾鈺成，最近就應《am730》邀請埋枱打雀吹水，席間爆咗唔少猛料，包括廣播處前處長張敏儀嘅「牌技」，以及馬丁打牌期間嬲到掟嘢落街。
曾主席話計數不及運氣
相信唔少人都係細細個就識打牌，但未必有馬丁咁早，因為佢出世時媽媽就係打緊麻雀，佢形容：「突然間就嚟嘞，我就出世嘞！」原來呢三大黨創黨主席未試過一齊打牌，但飛哥那些年就經常喺馬丁屋企開枱，另外兩隻麻雀腳係張鑑泉同周梁淑怡。
之不過令馬丁較難忘嘅麻雀腳卻係張敏儀，佢直指張大姐「好鬼離譜」，「佢要中發白碰晒，碰埋九筒，單吊隻一筒，佢又要么九，又要混一色，贏一鋪佢就開心到暈，但其他係輸晒㗎！」其間，飛哥大爆當年聽過馬丁掟麻雀落街，馬丁憶述連同佢四位大狀喺佢屋企開枱，有個雀友一路食煙，但又一路贏，最憎人食煙嘅佢就一手攞起佢包煙掟落街，可惜冇交代掟完後，形勢有冇大逆轉。
數學好叻嘅曾主席，憶述讀書時代學識打牌，但佢竟然話麻雀枱上唔好計數，「有時叫三飛，等極都等唔到，佢（其他人）就儍儍哋單吊都即刻食，講運㖭！」講講吓，飛哥自爆以前打得好大，試過同肥肥（沈殿霞）打牌出銃一鋪要5千蚊，仲話試過開張24萬支票埋單，不過𠵱家幾百蚊當玩吓，旨在過日辰。
李八方