公院過年前淪陷，急症室人龍打困籠，誇張到排隊十二小時才輪到。公營醫院爆床的慘烈，醫護形容為戰壕。袁國勇醫生一錘定音說：政府撥款五百億吧。給前線去打仗，救苦救難，挽公院崩潰於既倒，五百億，是還魂的一支強心針。
但林鄭治下，茅波首份預算案，將五百億搞錯抬頭人，竟然撥俾科技園。後者的頭頭，由林鄭欽點上位的羅范女士執金咁口，得戚到呢，以一貫鐵嘴雞口吻酸年輕人：「後生仔，捱吓啦！」良心如生鏽廢鐵的羅范，還對記者認威說，一擲五百億俾科技園，翌日外國傳媒即高度關注，新加坡傳媒、美國傳媒都有報道。「度度都關注，香港真係嚟真！」
賣身N年、永續奉迎權貴的羅范，每次出口，真係嚟料，難聽過粗口。叫後生仔捱吓啦，捱到條鐵咁，一病，入公院，連一個床位都無剩，要坐在走廊，以凳代床。捱？羅范試吓挑機叫袁國勇捱吓呀笨！食過689當年上海仔桃園飯局的羅范，一行埋林鄭就嚟真，擸到五百億落袋，後生仔捱柒世都吃不到羅范這鍋富貴飯。咦，高度關注吓，係咪又關佔中事？