費倫天拿隊長艾斯托利禮拜日突然過身，意媒話初步死因相信係心臟病，球員嘅隱疾又成為大家關心嘅問題，據《ESPN》指，車路士中場尼高路簡迪原來上星期五喺訓練基地練習後突然暈低，好彩檢查後冇發現問題，因為咁所以佢缺席周日車仔作客0:1輸畀曼城嘅英超。好彩簡迪暈低之後恢復意識，經醫生檢查後冇發現身體有任何異常。不過到周日對曼城賽前，簡迪依然報稱不適，領隊干地決定畀佢休戰，但預計其後可以踢得。消息指簡迪可能係因為喺寒冷嘅戶外練習後，返到有暖氣嘅更衣室時，唔適應咁大嘅溫差而暈倒。
艾斯托利周四舉殯
講番周日喺酒店裏面離世，終年31歲嘅艾斯托利，周二已經完成解剖，費倫天拿宣佈佢嘅13號波衫將會高掛以作紀念，而佢嘅遺體會喺周三運返佛羅倫斯火化，周四上午10點喺當地聖十字教堂舉行葬禮。