雷神莫雷拉最叻贏馬外，另一個技能當然係搶馬返來騎，試問如果搶唔到好馬騎，亦冇可能贏到咁多Win，而雷神最新一匹收穫，就係呂健威馬房的「威進駒」，已經接手過檔，親自操過兩課了。
「威進駒」馬主為蔡黃玲玲、蔡金山與蔡潤初，他們在去年香港拍賣會以750萬投得，此駒暫時表現亦算好好，4戰得冠亞季殿各一佳績，全有獎金。其中「威進駒」上仗1400米跑第二，只以半馬位之微負給「環翠戰士」，但蹄下敗將季軍馬「川河領駒」再出立刻補中輕勝，可見「威進駒」的實力仍有餘未盡。
亦可能因為這一仗，給雷神睇中，把「威進駒」據為己有，但與此同時，過去4戰俱為此駒執韁的柏寶，要同「威進駒」講拜拜了。這匹四歲馬目前評三班62分，可能換人原因是柏寶造不到磅，但無論如何，雷神接手已是事實。估計此駒會報爭3月18日打吡日的三班1400米，如何由雷神贏到嘅話，他日柏寶想攞番嚟騎，就難過登天了。