特區政府派唔派錢，唔只市民肉緊，仲有立法會前主席曾鈺成。繼上周喺報章專欄指政府應全民派錢，唔派或者會違反《基本法》第107條嘅量入為出原則，阿曾噚日喺專欄再發功，喺題為〈顧此失彼〉文章中逐點反駁坊間唔派錢理據，仲批評特區政府自以為是㖭，財政司司長陳茂波有冇計仔平息曾主席怒火？
指政府自以為是
政府有成1,380億盈餘，卻未有開水喉人人派錢，連日捱轟。曾鈺成都加入發炮行列，噚日喺《am730》專欄作出四點反駁，火力好猛吓。阿曾解釋，有反對派錢人士認為政府分配資源應有針對性，派錢係漫無目的，佢認為呢個係「政府自以為是」嘅想法，直指「由政府決定誰應受惠，厚此薄彼、顧此失彼」，而全民派錢至少都一視同仁，人人受惠。
但人人派幾千蚊，買部手機、去次旅行就會用晒，都係燒煙花咋喎。阿曾對此反問預算案宣佈嘅退稅、免差餉甚至綜援出三糧，又點知受惠者係咪用嚟買手機、去旅行，一下子用晒？佢認為「財爺無論派甚麼 『糖』，都是吃完便沒有了」，質疑煙花論點解只針對全民派錢？
另有人話，政府有錢都應該用嚟多啲起醫院、安老院，增加公共服務，唔係派錢啩。阿曾解構病人逼爆醫院、長者輪候唔到院舍，唔係因為政府冇錢起醫院同安老院，𠵱家問題焦點係政府唔用嘅錢應存入庫房，定係攞一部份出嚟還畀市民，即使派錢，都唔會減少政府可以用嚟改善服務同投資未來嘅資源噃。
嗱，如果連首富李嘉誠都派，好多餘喎！阿曾亦反問，預算案攞嚟與民共享嘅524億，「有多少是派得『多餘』、派給沒需要的人？」認為任何還富於民措施包括全民派錢都係提供方便辦法，等自願者將收到嘅錢捐畀有需要嘅人，「何患多餘？」
李八方