民主黨立法會議員涂謹申平日喺立法會質詢官員時中氣十足，可能同佢兒時經歷有關！阿涂話佢細個先後喺新蒲崗、慈雲山住過，雖然居住環境好多三教九流，但由於佢爸爸係中醫師，唔少黑社會都要去求醫，佢係中醫師個仔，冇人敢蝦佢，而佢仲成日喺舖頭食高麗參，唔多唔少幫佢補咗氣。
身為家中獨子嘅阿涂今年踏入55歲。中華基督教會基華小學畢業後，阿涂入咗九龍華仁，再喺港大法律系學士畢業，之後就做律師，再做埋區議員兼立法會議員。
「食窮」中醫老竇
阿涂話兒時最難忘係邊做功課邊身兼「掌櫃」幫手睇舖，佢有一個特殊習慣，就係食高麗參！阿涂話爸爸間中醫舖有好多涼茶「送口」，包括山楂餅、嘉應子等，但佢全部唔鍾意，只愛高麗參片，因為甘甘地，好過癮，卻因此常被爸爸打手板，鬧佢：「食窮嘞！十幾蚊一片㗎！」阿涂仲話囝囝可能有佢呢方面嘅遺傳，細細個已經鍾意食參，佢就覺得現時中氣十足，就係因為自小已經食高麗參補氣！
阿涂話有跟爸爸學過吓望聞問切，但到中三、四就冇學，原來爸爸一直想佢讀醫，咁就可以做到中西合璧，但佢最後都係揀咗法律系，原因相當簡單，因為發現同房讀醫嘅同學，經常讀通頂，實在太辛苦，覺得讀法律易好多，而佢1983年喺法律學院迎新營做組長時，組員之一仲包括前律政司司長袁國強㖭，但佢話兩人交流唔多。
