獲民主派支持出戰立法會港島區補選嘅區諾軒，最近獲香港眾志周庭泳裝上陣幫拖宣傳，引起哄動。周庭噚日出席區諾軒造會時被問到泳裝上陣宣傳片至今有成7萬點擊率及逾2,300個like時就話，好多謝每一個睇、支持同分享呢短片嘅人，希望大家畀心機令更多人知道3.11要投票，「唔好睇小自己嗰一票，又或者覺得民主派贏硬，就唔出嚟投」。
周庭透露短片喺被DQ前喺九龍東一間會所泳池所拍，由夜晚10點半拍到凌晨3點，雖然係室內暖水池，但唔知點解拍攝時泳池已關咗暖水裝置，其後開番時亦唔太暖，令佢捱住凍拍攝，但佢都話好享受拍攝過程，因為真係好鍾意水中世界，佢早前喺「八方相當年」欄目都分享過游水感受。問到泳衣上鏡有冇心理壓力？佢話冇，「因為游泳本身係一件好健康的事，我以前操水都係咁」。