特區回歸後，有關去殖化嘅舉動，陸續出現，除咗2007年強拆皇后碼頭，全國港澳研究會會長陳佐洱早年批評香港冇依法實施「去殖民化」後，就發生舊郵筒要拆皇徽爭議。
2015年一批約59個英治時期嘅舊郵筒，被香港郵政以皇室徽號不合時宜計劃用鐵板遮蓋標記，再劃一標示香港郵政嘅白色蜂鳥標誌，香港郵政去年回應時就話喎，政府尚在研究係咪用鐵板遮蓋皇室徽號喎。查實呢批舊郵筒大部份喺英國製造，遍佈港九新界，郵筒均依據年份刻有6名英王統治的標記或皇室徽號，當中仍服役嘅舊郵筒包括喬治五世、喬治六世及伊利沙伯二世。
除咗郵筒，北京連步操都要管埋，中聯辦據報有意要求用英式步操嘅制服團體轉用中式步操，掀起新一波去殖化浪潮，唔知往後仲有乜嘢英治物品會中招？