中超開季前，得到富商王健林條大水喉入主嘅升班馬大連一方，喺上月底用4,800萬歐元買咗恩歷克卡拉斯高同奧斯華度加坦兩位馬德里體育會球員，上周六嘅中超開鑼戰兩個外援一齊打前鋒，作客有巴西球星奧斯卡杜斯山度士同侯克嘅上屆亞軍上海上港，點知吞夠八隻光蛋，輸到破中超紀錄！
上港奧斯卡武磊戴帽
大連一方有荷西方迪打中堅，加上卡拉斯高同加坦打前鋒，不過其他球員嘅級數同上港差幾條街咁。開波只係29秒，奧斯卡就接應胡靖航妙傳，右腳射遠柱得手領先1:0；戰至24分鐘，上港嘅侯克右路傳中被大連門將托出不遠，奧斯卡隨即喺左路起腳破網；37分鐘，侯克禁區內博到荷西方迪侵犯，親自操刀12碼命中，幫上港半場就領先大連一方3:0。
下半場上港再轟五粒，先有前鋒武磊分別喺60分鐘、65分鐘及83分鐘入波上演帽子戲法，加上奧斯卡75分鐘射入今仗第三球都戴帽，再有呂文君85分鐘錦上添花，鎖定8:0狂炒大連一方。
上海上港今場不但創出中超最大勝仗，同時係中超有紀錄以來最大分差，兼且平咗大連實德喺2001年創下嘅紀錄，當時實德喺甲A（中超前身）都以8:0呢個比數大勝八一振邦，估唔到17年後另一支有份創下呢個紀錄嘅球隊都係嚟自王健林嘅大連，不過今次係輸波。
賽前叫全國直播丟架
大連今季高調大手筆引援，但一開季就輸鑊甘，最冇面嘅都係金主王健林喇！佢離開咗中國球壇18年，據內地消息指佢指示旗下全國嘅萬達廣場都要直播呢場波，點知輸得咁肉酸，你叫王健林塊面可以放去邊吖？
大敗一場，點都要有個人孭鑊，內地網民就話今場大連一方嘅最大罪人肯定係教練馬林，除咗將以往踢開翼鋒嘅加坦同卡拉斯高安排踢箭頭之外，又收起上季嘅衝超功臣穆謝奎，排陣亂咁嚟咁話。網民亦都當然大力恥笑啦，有人就喺王健林個仔王思聰嘅微博留言，叫佢勸吓佢老竇唔好再亂咁使錢。