今屆香港打吡3月18日上演，下星期公佈正選馬名單，出戰今日（3日）沙田第七場二班草地1800米的7匹4歲馬都報了打吡，而其中「陸寶」、「興爾」、「軍民歡」、「福將」同「怪獸剋星」都唔夠90分，趕唔趕到尾班車取得打吡入場券，真係還看今朝。
由韋達策騎嘅「軍民歡」較有機會搶到入場券，此駒在港第二戰，即上仗谷草1650米，86倍亦衝入季軍，好快適應香港環境，「軍民歡」喺英國曾三勝2000米左右路程，照計今仗扳上1800米更合發揮，真係入選打吡嘅話，都係奇兵一路。
至於「軍民歡」今日的對手「喜裝寶」，喺經典一哩賽和香港經典盃均跑第5，目前96分，篤定入選打吡。騎師祈普敦好開心咁話如無意外，自己會在打吡策「喜裝寶」爭標，記得同主馬「喜旺寶」上季由祈普敦連贏三場後，打吡卻換上天下第一高手莫雅，當時祈普敦難掩失落之情。
祈普敦表示「喜裝寶」近仗接連面對勁旅，亦次次都交出一段追勢，今日爭二班1800米，對手實力遠遜上次香港經典盃，「喜裝寶」隨時有機會喺打吡前先贏一仗。