關東屬日聯大戶，共有7支球隊，包括衞冕嘅川崎前鋒、亞軍鹿島鹿角，以及升班馬湘南比馬等。
八屆日聯盟主鹿角（96,98,00,01,07,08,09,16）上季倒灶，最後一輪失分失冠，今季有國腳守將內田篤人由歐洲回歸，後防新兵仲有犬飼智也同安西幸輝，前鋒金崎夢生會轉著10號波衫。上季鹿角場均只失0.91球係日聯最佳，而且仲係作客王，17作客12勝，勝率有71%。
00年首次升上頂級聯賽嘅川崎前鋒，上季場均入2.08球，係18隊之冠，而17主場12勝，都係71%勝率，成功首奪日聯冠軍。以衞冕為目標嘅前鋒，上季射入23球 神射手小林悠留隊，新兵有回歸嘅大久保嘉人同齋藤學，大久保唔著以前用慣嘅13號，改為象徵1+3嘅4號。而冇10號著嘅齋藤學，亦揀嘅37號，3+7咪就係10號。
浦和紅鑽老闆之一係三菱重工，自然用紅色鑽石嚟代表球隊。紅鑽自06年後未再贏過日聯冠軍，上年專攻亞冠盃就成功奪冠，可惜亞冠決賽入波嘅功臣、巴西前鋒拿費爾達施華離隊去中超掘金，今季進攻靠晒上季日聯入20球嘅興梠慎三，睇吓佢哋保唔保得住主場入球「大」本色，上季17場有13場開三球或以上。