自從2008年傳媒揭發港灣豪庭唔開放公眾可以使用嘅公共空間，社會開始越嚟越關心呢啲由私人屋苑管理嘅公共空間，究竟有冇開放畀公眾使用？民間團體「拓展公共空間」早排公佈一個「私人發展公共空間」審計報告，隨機抽樣11個有公共空間嘅私人屋苑，從設施暢達性、環境及設施保養清潔情況、公眾使用率、以及能否促進人與人交流四方面評估。
結果發現11個私人屋苑入面，只有沙田駿景園、油麻地駿發花園 、西營盤縉城峰合格，其他好似麗城花園第二及第三期 、城市花園 、港灣豪庭、海逸豪園、半島豪庭、寶翠園、奧海城一期嘅奧海城海濱公園、同埋奧海城二期嘅奧海公園等，全部不合格，似乎私人屋苑喺開放公共空間方面仲有好大改善空間。