阿仙奴禮拜四英超返到阿聯酋主場再鬥曼城，點知繼禮拜日英聯盃決賽後兵工廠又吞三蛋，失嘅三球仲係喺上半場短短33分鐘內發生，今季三對曼城都失三球，不過領隊雲格仲死撐話可以追番前四名。
榜首曼城雖然作客，但亦係佔主動嘅一隊，15分鐘貝拿度施華已經射入靚波領先。其後喺28分鐘，大衛施華接應阿古路傳送近門射入，將紀錄拉開到2:0。五分鐘後，基爾獲加右路地波傳中，利萊辛尼小禁區接應射入，遙遙領先至三球。下半場兵工廠有12碼機會，可惜奧巴美揚操刀被艾達臣摩拉斯撲出，最後慘敗0:3。踏入2018年，阿仙奴各項賽事已經輸咗七場波，比榜尾嘅西布朗仲衰。賽後領隊雲格就話仲有時間畀球隊追上前四，「球隊正喺困難嘅時間，我哋要團結一致，唔可以分裂。」
贏波嘅曼城，家吓已經領先次席嘅曼聯16分，如果曼城贏出未來四場，包括對曼聯嘅英超比賽，就可以喺死敵面前稱王，似乎已經計好晒數。不過，曼城嚟緊下周日就要面對車路士，賽後領隊哥迪奧拿都懶理贏幾多場就封王嘅事，表明希望球員可以以勝利嘅欲望蓋過疲倦，繼續贏落去。
