行政立法關係呢啲咁虛無縹緲嘅嘢，真係好難話好咗定差咗，不過從一啲小事可以略見端倪。民主黨將會喺月尾舉辦一年一度黨慶兼籌款晚宴，689年代問責官員被禁出席，但到咗林鄭月娥坐正特首就唔同講法。娥特已經答應咗帶埋三司同幾位局長現身晚宴嘅酒會，早前有報道話娥特仲會留低食飯，不過白鴿黨話娥特其實仲未覆㗎。
民主黨黨慶晚宴將會喺本月20號晚舉行。籌委會主席袁海文話，暫時娥特、三司、6位局長，連埋副局、政助、常秘等加埋超過30位高官都會現身酒會。至於娥特仲未覆留唔留低食飯，咁會唔會到時想食都冇位畀佢？白鴿黨就話可以放心，就算娥特到時先決定留，白鴿黨都有位畀佢坐嘅！
籌款望超3爆4
對於娥特今次咁畀面算唔算破冰先？白鴿黨副主席羅健熙就講明，同林鄭只係工作關係，將來有嘢要做都係照做，唔會有變。
其實今次晚宴破冰只係其次，籌款先係主菜，早排有消息話白鴿黨畀某捐款大戶關水喉，所以袁海文就身負重任喇，事關今年目標係「超3爆4」，即係籌到超過300萬，甚至過400萬，好彩今年晚宴嘅買枱進度唔錯，目前為止都有逾30張枱有人買咗。
另外，一如去年安排，今年唔會搞拍賣或者即場揼心口，免得有尷尬場面。娛賓方面，當然唔少得播放佢哋精心炮製嘅短片喇，羅健熙透露，條片係拍得比較綜藝式嘅，總之內涵多啲，大家要拭目以待喇。