前警隊一哥李明逵噚日應邀同中學生分享警隊34年經歷。佢話：「錢帶唔走，做個墳場有錢鬼又如何？」退休後只求每日兩餐就滿足，繼續打網球、學廚藝教學生煮飯仔。
李明逵為咗想加入警察籃球隊，中大歷史系畢業後考見習督察。當年差佬貪污舞弊，坊間諷剌「有牌爛仔」，佢考入警校，阿媽聽到幾乎喊出嚟。佢話，當年大學生冇乜人會考警察，廉署設立後，同事以為佢係卧底，唔敢叫佢貪埋一份。
李明逵話從來冇諗過做一哥，任內面對唔少逆境，慶幸家教嚴格，從小培養出自律與責任心。佢任內處理不少重大事作，全憑警隊團隊共同努力解決，只要同人合作先會成功。
佢以「逆境自強，感恩回饋」勉勵出席中學生。佢目前係非牟利機構公共行政學院院長，義務負責策劃及安排中國內地中、高級公務員來港接受管理培訓課程。