呢個世界係冇免費午餐嘅。民建聯何俊賢噚日捧住一大盤士多啤梨去開財委會，請官員、議員同埋傳媒享用，有記者食完都大讚甜、多汁、直頭好似日本嘅士多啤梨咁。原來呢啲士多啤梨的確係日本品種，不過產地係觀塘。
是咁的，何俊賢有位農友搞緊水耕，但係就面對唔少問題，例如去農地種又被政府話唔算係種植，去工廈種又會被政府話唔係合規格，所以希望政府喺政策上可以拆牆鬆綁、開闊一下啲思維，同時亦借機等議員認識多啲今時今日嘅農業。
何俊賢仲帶咗杯裝沙律菜畀議員試吓，陳恒鑌食完士多啤梨再食埋沙律菜，仲形容啲士多啤梨「有種講不出的春天味」㖭。