講起罷跑，肯定會諗起「巴基之星」。呢匹曾經罷跑誤盡蒼生的性格巨星，經過練馬師告東尼八個月特訓後，終於通過四關測試，百厭馬唔再百厭，仲於剛周日（2月25日）香港金盃復出，跑獲一席輸唔遠的殿軍。
其實罷跑絕對唔係「巴基之星」的專利，現年七歲嘅澳洲過氣灰色神獸「尚多湖」，於剛周二（2月27日）蘭域馬場試閘中，雖然肯乖乖入閘，但當閘門打開後，牠卻拒絕展步，搞到練馬師賀維恩擰晒頭。
之後賀維恩急急俾呢匹灰馬再試閘，惟其情況依舊，連續第二次不肯出閘。隨後，當地馬會着令「尚多湖」暫時不能參賽，直到佢能夠順利出閘競跑為止。
猶幸，呢匹16年沙田馬場主席短途獎盟主事後被驗過身體冇咩唔妥，今次試閘拒絕展步，或與本身厭戰有關。
若然「尚多湖」想再度衛冕4月初舉行的史密夫錦標，可能要搵馬語大師幫幫手，否則唔知幾時至可以重新出賽。
圖片來源：Amanda Wood